منحة المجلس الاعلى لشؤون المعوقين

منحة المجلس الاعلى لشؤون المعوقين

 

في البداية لازم تعرفوا أنه المنحة مخصصه لذوي الاحتياجات الخاصة الذين لديهم عجز وإعاقة مزمنه وهي مش منحة كاملة، وبتنقسم المنحة لقسمين، قسم للقبول الموحد وقسم خصم على الرسوم الجامعية.

 

قسم القبول الموحد هو بساعد الطالب في التنافس على المقعد الجامعي، بحيث أنه بخصص عدد محدد من المقاعد في التخصصات لذوي الاحتياجات الخاصة وبس يقدم الطالب بتنافس على هاي المقاعد مع المتقدمين من ذوي الاحتياجات الخاصة فقط يعني ما بنافس مع كل طلاب المملكة

 

قسم الخصم بشمل التنافس وبتكون نسبة الخصم على التنافس 90% وعلى الطالب دفع 10% من سعر الساعة  ولا يشمل الخصم رسوم الفصل ورسوم التسجيل

 

 

شروط التقديم للمنحة

انه يكون الطالب اردني الجنسية.

ويكون معدل التوجيهي لا يقل عن 65%.

نسبة العجز ما بتقل عن 40% ومع وجود تقرير طبي بشمل هاي الشروط:

الإعاقة البصرية: تعتمد نسبة حدة الإبصار (6/21) مع التصحيح البصري في أفضل العينين وأن لا يتجاوز المجال البصري (20) درجة.

الإعاقة السمعية: تعتمد نسبة ضعف السمع (41) ديسيبل في كلتا الأُذنين باستعمال المعينات السمعية.

الاعاقة الحركية: إعتماد نسبة (40% ) على الأقل، مع ضرورة تحديد شكل الإعاقة.

-  قصار القامة: إعتماد طول 131 سم فما دون للذكور و 121 سم فما دون للإناث.

 

 

التقدم لهاي المنحة بكون من خلال انك بتقدم طلب قبول موحد عادي من الموقع وبتراجع المجلس الأعلى لشؤون الأشخاص ذوي الاعاقة في الفترة الي بحددوها ..

بتاخذ منهم كتاب وبتروح على اللجان الطبية اللوائية وبكتبولك تقرير طبي

بعد ما يجهز بتروح على المجلس أو الفرع الي قريب عليك وبتسلم الطلب وهيك امورك بتكون تمام..

 

بالنسبة للوثائق المطلوبة

1 - صورة مصدقة عن كشف علامات الثانوية العامة للطالب.

2- النسخة الأصلية/ او صورة مصدقة من تقرير اللجان الطبية اللوائية يوضح نسبة العجز الناتجة عن الإعاقة للطالب. (بعد ما تاخذ الكتاب بتعمله)

3 - النسخة الأصلية او صورة مصدقة من التقرير التشخيصي المعتمد والصادر عن المستشفيات الحكومية للطالب ومراكز التشخيص المعتمدة.(تقرير أولي من اي مستشفى حكومي)

4- صورة مصدقة عن هوية الأحوال المدنية للطالب.

5- صورتين شخصيتين حديثتين للطالب.

 

بالنسبة للخصم الجامعي إذا كنتوا مقدمين لمنحة القبول الموحد فراح تحصلوا عليه بدون ما تعملوا اشي، وبتلاقوا جهة الانفاق محطوطة المجلس الأعلى وبتدفعوا بس ١٠٪ من سعر الساعات حتى باول مرة بتسجلوا فيها بالجامعة راح تدفعوا والخصم فعال 

 

أما إذا مش مقدمين على القبول الموحد ومطابقين لنفس الشروط فوق فبتقدروا تحصلو على الخصم من خلال

إنه يتقدم الطالب بطلب في المجلس للحصول على الخصم الجامعي وبقدم معه الوثائق هاي

 

- شهادة إثبات طالب من الجامعة توضح نوع قبول الطالب والمرحلة الدراسية.

- تقرير طبي تشخيصي أصلي أو صورة مصدقة صادر عن جهة حكومية معتمدة (أحد مراكز تشخيص الاعاقات أو أي مستشفى حكومي) يوضح طبيعة و درجة  الاعاقة.

-تقرير اللجان الطبية اللوائية الصادر عن مديريات الصحة في المملكة نسخة أصلية أو صورة مصدقة والذي يوضح نسبة العجز.

-صورة عن هوية الأحوال المدنية الخاصة بالطالب.

 

 

بعد هيك بتم اصدار كتاب الخصم الجامعي وبتم تسليمه للجامعة والاستفادة من الخصم ..